Ամփոփելով 2023 թվականի 1-ին եռամսյակի արդյունքները` կարող ենք տեսնել, որ հավաքագրած ապահովագրավճարներով 2022 թվականի նույն ժամանակաշրջանի համեմատ շուկայում գրանցվել է ավելի քան 19% կամ 3,8 մլրդ դրամի աճ։ Ի դեպ, այն կազմում է ամբողջ 2022 թվականի հավաքագրած ապահովագրավճարների ավելի քան 40%-ը, ինչը կարելի է խոստումնալից տարեսկիզբ համարել։
Գերակշիռ մասը կազմում է առողջության ապահովագրությունը, որն իր մեջ ներառում է նաև առողջության պարտադիր ապահովագրությունը (ենթադրաբար այն կազմում է մոտավորապես 3,9 մլրդ ՀՀ դրամ)։ Նախորդ տարվա նույն ժամանակաշրջանի համեմատ առողջության ապահովագրության պորտֆելը գրանցել է մոտ 6% աճ՝ զբաղեցնելով շուկայի 37%-ը։ Միայն առողջության կամավոր ապահովագրության ապահովագրավճարներն աճել են 11%-ով, որն այդքան էլ տպավորիչ չէ անցած տարվա նույն ժամանակահատվածի աճի համեմատ (2021-2022 թթ․ առաջին կիսամյակի համեմատությամբ գրանցվել էր 44% աճ)։
Հավաքագրած ապահովագրավճարներով շուկայում 2-րդը ԱՊՊԱ տեսակինն է՝ 28%։ Նախորդ տարվա նույն ժամանակաշրջանի համեմատ նկատվում է 11% աճ: Հետաքրքրական կլինի հետևել ԱՊՊԱ տեսակի ապահովագրավճարներին ապրիլի 1-ի ազատականացումից հետո։
Գույքի ապահովագրությունը կազմում է շուկայի 15%-ը, որը նախորդ տարվա համեմատ գրանցել է նույնչափ՝ 15% աճ։
Հրապարակվել են գյուղատնտեսության ապահովագրության ապահովագրավճարների տվյալները, և այն կազմում է շուկայի 6%-ը։ Ապահովագրական ընկերություններից 2-ը հավաքագրել են ավելի քան 1,3 մլրդ ՀՀ դրամ ապահովագրավճար, որի միայն 85%-ը «Ինգո Արմենիա» ապահովագրական ընկերությանն է։
Տպավորիչ աճ է գրանցել ԿԱՍԿՈ ապահովագրությունը՝ 67% նախորդ տարվա նույն ժամանակաշրջանի համեմատ։ Մասնավորապես «Ռեգո Ինշուրանս»-ը գերազանցել է նախորդ տարվա առաջին եռամսյակի ցուցանիշը ավելի քան 5 անգամ։ Հաջորդ բարձր արդյունքները «Սիլ Ինշուրանս»-ինը, «Արմենիա Ինշուրանս»-ինը և «Նաիրի Ինշուրանս»-ինն են։ «Սիլ Ինշուրանս»-ը ավելի քան 2,6 անգամ գերազանցել է նախորդ տարվա նույն ժամանակաշրջանի ցուցանիշը, «Արմենիա Ինշուրանս»-ը՝ 2,3 անգամ, իսկ «Նաիրի Ինշուրանս»-ը՝ գրեթե 2 անգամ։
83% աճ է գրանցել ճամփորդության ապահովագրությունը․ միայն «Ինգո Արմենիա»-ն և «Սիլ Ինշուրանս»-ը ավելի քան 2,4 անգամ մեծացրել են իրենց ցուցանիշները։
Էական աճ է գրանցել բռեների ապահովագրությունը՝ կրկնակի ավելանալով նախորդ տարվա նույն ժամանակաշրջանի համեմատ։ Իսկ ավիացիոն պատասխանատվության ապահովագրությունը՝ աննախադեպ 6,5 անգամ։ Հայաստանում ապահովագրական շուկայի զարգացման ամենակարևոր գործոնը կամավոր տեսակների զարգացումն է (առանց ԱՊՊԱ և սոց. փաթեթ): Նախորդ տարվա առաջին եռամսյակի համեմատ այն գրանցել է 32% աճ և գրավել շուկայի 55,6%-ը։
Ինչպես նախորդ, այնպես էլ այս տարվա շուկայի առաջատարը «Ինգո Արմենիա»-ն է՝ հավաքագրելով գրեթե 8,9 մլրդ ՀՀ դրամ ապահովագրավճար և գրավելով շուկայի 38%-ը։ Հաջորդում է «Լիգա Ինշուրանս»-ը՝ 23% (5,3 մլրդ ՀՀ դրամ), «Նաիրի Ինշուրանս»-ը՝ 17% (4 մլրդ ՀՀ դրամ), «Սիլ Ինշուրանս», «Արմենիա Ինշուրանս» և «Ռեգո Ինշուրանս»-ը՝ համապատասխանաբար 9% (2,1 մլրդ), 8% (1,9 մլրդ) և 5% (1,3 մլրդ):
Կամավոր տեսակներով բավականին երկար տարիներ առաջատարը նույնպես «Ինգո Արմենիա»-ն է՝ 53%՝ հավաքագրելով 6,9 մլրդ ՀՀ դրամ ապահովագրավճար։ «Լիգա Ինշուրանս»-ը, հավաքագրելով ավելի քան 2,5 մլրդ ՀՀ դրամ ապահովագրավճար, զբաղեցնում է շուկայի 20%-ը, «Նաիրի Ինշուրանս»-ը 1,6 մլրդ ՀՀ դրամով՝ 12%, իսկ «Արմենիա Ինշուրանս», «Սիլ Ինշուրանս» և «Ռեգո Ինշուրանս»-ը համապատասխանաբար՝ 7% (945 մլն), 6% (726 մլն) և 3% (404 մլն):
«Ինգո Արմենիա»-ն առաջատարն է հետևյալ ապահովագրատեսակներով՝
- Դժբախտ պատահարներից ապահովագրություն,
- Առողջության ապահովագրություն (ներառյալ սոց․ փաթեթը),
- ԿԱՍԿՈ,
- Գույքի ապահովագրություն,
- Գյուղատնտեսության ապահովագրություն,
- Ընդհանուր պատասխանատվության ապահովագրություն,
- Ճամփորդության ապահովագրություն,
- Օդային տրանսպորտի ապահովագրություն։
«Լիգա Ինշուրանս»-ը առաջատար է հետևյալ ապահովագրատեսակներով՝
- Բեռների ապահովագրություն,
- Կամավոր ԱՊԱ,
- Ֆինանսական վնասների ապահովագրություն։
«Նաիրի Ինշուրանս»-ը առաջատարն է ԱՊՊԱ տեսակով, իսկ «Արմենիա Ինշուրանս»-ը` երաշխիքի և վարկի ապահովագրատեսակներով։
Ինչպես երևում է, բացի «Ինգո Արմենիա»-ից և «Լիգա Ինշուրանս»-ից մյուս ապահովագրական ընկերությունների մոտ նկատվում է հատուցումների ավելացում։
2023 թվականի առաջին եռամսյակում շուկայի զուտ շահույթը կազմում է ավելի քան 1,7 մլրդ ՀՀ դրամ՝ նախորդ տարվա նույն ժամանակաշրջանի 1,1 մլրդ-ի փոխարեն։ Ամենամեծ թվով զուտ շահույթ է գրանցել «Նաիրի Ինշուրանս»-ը՝ 489 մլն դրամի չափով, կամ 29% մասնաբաժնով։ Երկրորդ ամենամեծ շահույթը գրանցել է «Լիգա Ինշուրանս»-ը՝ 404 մլն դրամի չափով (24%), իսկ երրորդը՝ «Ինգո Արմենիա»-ն՝ 357 մլն ՀՀ դրամի չափով (21%)։
5 ապահովագրական ընկերությունները բարելավել են իրենց ֆինանսական արդյունքի ցուցանիշները, միայն «Ռեգո Ինշուրանս»-ի ցուցանիշն է զիջում նախորդ տարվա նույն ժամանակաշրջանի ցուցանիշին։ Համեմատական պատկերը ներկայացնենք ստորև։
Ամփոփելով կարելի է նշել, որ առաջին եռամսյակը փակվել է հաջողությամբ, և բոլոր ապահովագրական ընկերությունն էլ ունեն դրական ցուցանիշներ, որն էլ ապահովում է շուկայի աճը։
