Հայաստանի ապահովագրական շուկայի ամփոփում. 2024 թվական

Հայաստանի ապահովագրական շուկան 2024 թվականին գրանցել է չնչին աճ՝ 3.6%-ի չափով, ինչը անհամեմատելի է ՀՆԱ աճի, ինչպես նաև ֆինանսական այլ ոլորտների՝ բանկային և վարկային կազմակերպությունների աճի հետ։

2024 թվականին ընդհանուր համախառն ապահովագրավճարները 2024 թվականին կազմել են 70.4 միլիարդ դրամ՝ համեմատած նախորդ տարվա նույն ժամանակաշրջանի հետ աճելով 3.6%-ով։ Մինչդեռ կամավոր ապահովագրական շուկայում գրանցվել է անկում՝ -1.6%։ Այս անկումը հիմնականում պայմանավորված է գյուղապահովագրության էական կրճատմամբ, ինչպես նաև մաքսային երաշխիքի շուկայի վերացմամբ։

Պարտադիր ապահովագրությունը՝ ԱՊՊԱ շուկայի գլխավորությամբ, աճել է 10.3%-ով, ինչը պայմանավորված է գների ազատականացման գործոնով, ինչպես նաև մեքենաների թվաքանակի շարունակական աճով։

Հատուցումներն աճել են 9.9%-ով՝ հասնելով 43.9 մլրդ դրամի, հատկապես ավելացել են առողջության ապահովագրության և ԿԱՍԿՈ-ի գծով, ինչը բացասական է ազդել ընկերությունների շահութաբերության վրա։

Համախառն ապահովագրավճարների համամասնությունը ՀՆԱ-ում մնում է ցածր՝ 0․7%, ինչը ցույց է տալիս, որ շուկան դեռևս զարգացած չէ՝ համեմատած տարածաշրջանային և համաշխարհային ցուցանիշների։

ԱՊՊԱ-ն շարունակում է մնալ ապահովագրական շուկայի խոշորագույն հատվածն ինչպես հավաքագրած ապահովագրավճարների մասով, այնպես էլ հատուցումների։ ԱՊՊԱ շուկայում, ըստ հավաքագրած ապահովագրավճարների, առաջատարն է Նաիրի Ինշուրանսը՝ 22% մասնաբաժնով, որին հաջորդում է Լիգա Ինշուրանսը՝ 20% և Արմենիա Ինշուրանսը՝ 19% մասնաբաժնով։

Առողջության կամավոր ապահովագրությունն (սոց. փաթեթ չներառած) ունեցել է համեմատաբար քիչ աճ՝ 15,2 մլրդ-ից հասնելով 15,7 մլրդ, սակայն նույնը չենք կարող ասել հատուցումների վերաբերյալ՝ 12,4 մլրդ 2023 թվականի դրությամբ, իսկ 2024 թվականի դրությամբ՝ 15 մլրդ։ Ըստ հավաքագրած ապահովագրավճարների՝ առաջատարը ԷՖԵՍ-ն է՝ 29%-ով, որին հաջորդում է Նաիրի Ինշուրանսը՝ 23% և Լիգա Ինշուրանսը՝ 22%:

2024 թվականին ՀՀ ապահովագրական շուկայի (ներառյալ ԱՊՊԱ և սոց. փաթեթ) առաջատարը Լիգա Ինշուրանսն է՝ զբաղեցնելով շուկայի 21%-ը։ Կամավոր ապահովագրական շուկայում առաջատարը ԷՖԵՍ ապահովագրական ընկերությունն է՝  շուկայի 31% մասնաբաժնով։

ԷՖԵՍ-ն առաջատար է հետևյալ ապահովագրատեսակներով.

• Դժբախտ պատահարներից ապահովագրություն,
• Առողջության ապահովագրություն (սոց․փաթեթը հաշվի չառած),
• ԿԱՍԿՈ ապահովագրություն,
• Գույքի ապահովագրություն,
• Ճամփորդության ապահովագրություն։

Լիգա-ն առաջատար է հետևյալ ապահովագրատեսակներով.

• Բեռների ապահովագրություն,
• ԱՊԿԱ,
• Ֆինանսական ռիսկեր,
• Ընդհանուր պատասխանատվություն։

 «Սոց․ փաթեթ»-ի գծով առաջատար է ԻՆԳՈ-ն: Ավիացիոն ապահովագրության առաջատարը Արմենիա Ինշուրանսն է։

Շահույթ

ՀՀ ապահովագրական շուկան 2024 թվականի դրությամբ ստացել է 1,2 մլրդ դրամ շահույթ, որը գրեթե 53%-ով քիչ է 2023 թվականի ցուցանիշից։ 7 ընկերություններից մեկն աշխատել է վնասով՝ Լիգան՝ 369,701 հազ դրամով։ Ամենամեծ շահույթը գրանցել է Արմենիա Ինշուրանսը՝ 589,890 հազ դրամ։